Според најновите резултати на меѓународната програма „Сино знаме“ на Фондацијата за еколошка едукација (FEE), Шпанија постави нов историски рекорд со вкупно 794 признанија, од кои 677 се доделени на уредени плажи. Тоа е зголемување за 44 признанија во однос со 2025 година, кога земјата имаше вкупно 750 награди, пренесува Euronews.
Грција го задржа второто место во светот со 657 вкупни признанија, од кои 624 се однесуваат на плажи, со што практично остана на истото ниво како во 2025 година и сè уште држи околу 15 отсто од сите наградени плажи во светот. Прва област во Грција е Халкидики со 93 Сини знамиња, додека Регионот Крит и понатаму го држи првото место со 154 наградени брегови.
Меѓународниот комитет додели признанија за вкупно 4.378 плажи, 747 марини i 158 туристички бродови ширум светот.
Рангирање на Сините знамиња за 2026 година
Регионите Валенсија, Андалузија и Галиција и понатаму доминираат во Шпанија, додека во Грција повторно се издвојуваат Халкидики и Крит. Италија ја зацврстува својата лидерска позиција во крајбрежниот туризам благодарение на 525 плажи кои во 2026 година добија Сино знаме. На церемонијата на доделување на наградите, одржана во Рим во четвртокот, беа претставени и 14 нови локации, со три кои не го потврдија својот статус, како и признанија за 87 наутички туристички марини и 23 езера.
Шпанија е на првото место на глобалната листа. Веднаш зад неа, на втората позиција е Грција. Турција заврши на третото место со 625 еколошки ознаки, покажувајќи висок степен на усогласеност во големите туристички центри како што е Анталија.
На четвртото место се наоѓа Италија со 525 наградени брегови, со тоа што оваа сезона во нејзината мрежа беа вклучени 14 нови локации. Португалија следи на петтото место со 438 Сини знамиња, што претставува благ пад во однос на минатата година поради построгите контроли и временските услови кои влијаеја на квалитетот на водата на одредени места. Кај нив наградите беа доделени за 396 плажи (од кои 350 морски и 46 речни), 21 марина и 21 туристички брод.
Што е Сино знаме?
Синото знаме се смета за една од најважните меѓународни ознаки за квалитет на бреговите, марините и одржливиот туризам. Плажите се оценуваат според строги критериуми кои го вклучуваат следново:
- Квалитет на водата,
- Безбедност и спасувачка служба,
- Пристапност,
- Заштита на животната средина,
- Чистота и управување со отпад.
Аналитичарите за туризам истакнуваат дека континуираната доминација на медитеранските земји ги одразува сè поголемите вложувања во одржлива туристичка инфраструктура, бидејќи сè повеќе патници избираат дестинации со сертифицирани еколошки стандарди. За Грција, задржувањето на второто место уште една година дополнително го зацврстува нејзиниот статус на една од водечките европски морски дестинации во пресрет на летната сезона 2026.
Извор: odrzime.rs
